我這半世未算趕,何妨迷路看風光?

By
踩鋼線妹 (2014-2016 英國)


問︰你來自哪裡?
答︰香港。

問︰你什麼時候參加工作假期?
答︰2014年。大學畢業之後,我take咗年gap year(空檔年),淨係返吓part-time(兼職)同埋去旅行。到第二年嘅畢業季(九月),覺得自己仲未想求其搵份工定落嚟,就決定去英國working holiday。

問︰你曾到哪裡工作假期?為什麼會選擇那個地方為目的地?
答︰我本身教英文嘅,都鍾意英國嘅文化,而且揸BNO(英國國民(海外)護照)申請去英國working holiday冇名額限制,幾時去都得。咁同年畢業嘅同學個個都搵緊工或者返緊工嘅時候,我就出發去英國了。

問︰在工作假期期間,你曾經做過什麼工作?你又有修讀什麼短期課程嗎?
答︰我第一年喺曼徹斯特(Manchester)嘅一間餐飲業公司嘅寫字樓做文職,之後又喺唐人街嘅珍珠奶茶店打工。其實嗰段時間過得唔係咁開心,覺得自己浪費緊時間,生活多數喺唐人街,旅行又去得唔多。於是決定夏天離開曼徹斯特,先返香港探一探屋企人,再諗之後嘅打算。九月返到香港,屋企人當然有微言,覺得我大學畢業點解唔乖乖哋喺香港認真工作,反而去外國打散工。當見到身邊同學朋友都開始建立事業,都有諗過︰「不如留喺香港算啦!」
但平靜落嚟諗返,我去英國唔係要賺大錢,純粹想試吓去外國生活。如果我咁就完咗個working holiday,咁我喺英國嘅回憶就只有唔開心,而冇好好享受過,亦都冇真正認識過英國,所以我決定——再試多次。我這半世未算趕,何妨迷路看風光?
於是2015年10月,我去咗倫敦。
因為之前嘅經歷,調整咗自己心態同期望。知道喺一個新地方開始唔容易,要比上次付出更大努力。嚟到倫敦我訂咗個目標畀自己,要喺一個星期之內搵到屋同埋搵到工。結果我真係做到——第三日就搵到屋,第四日就返工。
住方面,我喺北面一間sharehouse(合租房屋)租咗個套房,為咗平揀咗一個比較雜嘅區,仲要行二十分鐘先到地鐵站。(呢樣唔值得學習,大家要安全為先!之後轉咗工後,我有搬去好啲環境㗎。)
工方面。雖然生活指數很高,但倫敦對working holiday-er(工作假期參加者)嚟講絕對係最容易搵到工嘅城市。除咗最簡單嘅餐飲業外,零售業都係大部份人嘅選擇。呢度好興walk-in遞CV(直接進店內遞交履歷表)。好多人會去名店街,例如Oxford Street(牛津街)、Regent Street(攝政街)、Bond Street (龐德街)嘅舖頭,由街頭派落街尾。零售業知你懂兩文三語,收到你CV好快就會打電話邀請你面試。與此同時我又會上英國嘅中/英求職網應徵。當時心態係覺得有咩工就做住先,最緊要唔好冇收入,之後可以邊做邊搵比較理想嘅工作。結果我賣咗幾日衫,就轉到去律師樓做文職。由搵到呢份新工開始,可以話所有嘢都嚟個大逆轉,搵返之前喺曼徹斯特打沉咗嘅自信。
嚟到倫敦唔夠一個月,學到嘅已經比曼徹斯特多。好開心,對得住自己,無浪費到第二次機會。
初時喺律師樓都係做reception(接待),後來老闆知道我語文水平不錯,就畀我負責翻譯工作,由普通文件,到法律文件,之後仲有幫中國駐英大使館做嘅英國政策分析報告等等。得到機會同賞識好開心,更重要係搵返對自己嘅肯定。

問︰請分享你在工作假期中一個最難忘的經歷。
答︰喺律師樓做咗冇幾耐,有次大老闆搵我傾偈,同我討論一啲香港嘅社會時事。老闆係英國華人,佢有批評而家嘅香港年青人唔愛國、做嘢好衝動、唔顧後果……我一直覺得海外華人講愛國係好矛盾嘅一件事,口裡說不身體卻很誠實,但老闆講到海外華人一定愛國嗰陣講咗句︰「我哋咁多年一直受外國人歧視。中國強大我哋就強大,所以我哋先咁愛國。」我唔係認同佢呢句說話嘅邏輯,但呢番說話令我思考咗好耐,好似將心底一個謎底解開咗咁。呢次交談係個好特別嘅體驗,竟然有機會同海外華人討論時政,即使大家睇法未必一樣,但都可以理性對話,了解吓大家嘅諗法。
另外都留意到海外華人有啲好有趣嘅習俗,將本身華人社會嘅傳統文化糅合咗西方文化。例如佢哋會將聖誕當係農曆新年咁過,大老闆會派利是呀,我去咗一個BBC(英籍華人)朋友屋企過聖誕,佢地會食完聖誕大餐第二日就去酒樓食團年飯。
旅行方面,我冇好似其他人遊遍成個歐洲,而係盡量走遍英國。我好鍾意坐火車,每個周末都會坐火車去唔同城市,或者去就近曼徹斯特或者倫敦近郊嘅地方。藍藍綠綠嘅火車景,係其中一樣英國最靚嘅細節。
英國之中,我最鍾意係一個叫康和(Cornwall)嘅County(群),喺英國西南面盡頭,由倫敦坐火車去康和要五至六個鐘,主要城市包括Penzance、St.Ives。邊度都好靚,夏天坐住火車沿海直入英國西南部,你會希望呢程火車永遠都唔會到終點站。
大不列顛帝國除咗英格蘭同蘇格蘭,仲有威爾斯同北愛爾蘭都好靚,千祈唔好漏咗佢地!

問︰工作假期為你帶來最大的收穫是什麼?
答︰最大嘅收穫……好老套咁講係知道自己嘅不足。去英國之前我覺得自己英文都幾好,但嚟到英國接觸地道嘅英式英文,覺得自己好似又聾又啞咁,聽唔明又講唔好,覺得自己英文好差,打擊好大,發現自己之前嘅世界真係好窄。然後又試過搵唔到嘢做,令我不停懷疑自己,失去自信。
去到倫敦之後,因為曼徹斯特嘅一年,我已經適應到英式英文,仲搵到方法練習去令自己進步。工作上又做得唔錯有成功感,工餘時間可以坐火車、行書店、睇舞台劇同芭蕾舞等,真正明白work-life balance(工作與生活平衡)嘅意義。
我覺得自己真係透過working holiday感受到外國生活,接觸外國文化,而唔係打過吓工煮吓飯洗吓衫獨立生活呢啲喺香港都可以做到嘅嘢。最重要係我搵到自己鍾意嘅嘢,喺英國生活對藝術多咗認識,返到香港繼續接觸,發現原來香港都有好多好好嘅藝術作品,又有好多來自世界各地嘅表演者嚟香港演出。香港真係好多好有趣嘅東西,好多人話香港悶,其實可能係自己個人悶。我發現自己個人唔同咗,返到嚟再見到嘅香港亦唔再一樣,遊子歸家後重新愛上香港。

問:對於那些打算到你目的地工作假期的青年人,你能否給他們三個貼士?
1) 
要調整心態。有啲人目標訂得太高,例如覺得自己英文好,一定要搵到文職,但其實唔係咁易,呢度個個都識英文,點解要請你呢?我覺得既然就走得出嚟,不如試吓唔同嘅嘢。我打珍珠奶茶工嘅半年練好咗流利國語;我有朋友做零售識到一堆歐洲籍朋友一大班人每日返工摺衫都好開心,又有朋友喺蘇格蘭高地隱世打工,呢啲體驗都非常特別喺香港難啲試到。如果淨係講做文職,咁點解唔留喺香港,待遇仲更好啦?
但另一方面,我覺得都唔可以淨係做零售業或者飲食業做足兩年,新嘗試係好,但多嘗試更好。都係嗰句,出得嚟,要試更多做更多!
2) 
如果去英國working holiday,個人覺得選擇倫敦比較好,除咗工作機會較多,仲會見到更多唔同國籍唔同背景唔同性格嘅人。喺啲多華人嘅城市例如曼徹斯特、 Leeds、Birmingham,雖然都容易搵到工,但你嚟到英國,都唔會想留返喺華人圈子吧?
3) 
一定要搵機會去睇波!英超聯賽嘅氣氛係咁多個足球聯賽之中最熱烈嘅(票價亦都最貴!)英國本土球迷好熱衷足球,你要睇波?做咗會員都要抽籤先買到飛,仲要好多人一訂係訂年票,要佢地放出嚟合法嘅二手票網先有散飛,以致英超一票難求!
現場睇波氣氛好好,球迷情緒高漲,就算你本身唔鍾意足球,入到去都會睇得好興奮。除咗英超,我有朋友睇過英冠都話好好睇。另外有朋友睇過溫布頓網球、桌球大師賽都好正。去到英國一定要體驗吓!


問︰還有沒有什麼是你想補充的?
答︰好多人話去working holiday係浪費時間,返到嚟唔會有僱主肯請……但其實英國working holiday呢兩年我得到好多。如果唔係第一年嘅失敗,唔會有第二年嘅開心。而第二年嘅工作同文化體驗令我返到嚟香港搵工好順利。而且英國兩年磨練令我兩文三語更好,語言上學到嘅係超越廿年讀嘅書。我希望你,一旦決定要出去,就要跑得很遠!

提提你:以上各個參加者的經驗分享乃屬個人意見,並不代表勞工處的立場。工作假期參加者在出發前應做好資料搜集,以取得最新和有效的資訊。

(Chinese version only)

  Back