我这半世未算赶,何妨迷路看风光?

分享者:
踩钢线妹 (2014-2016 英国)


问︰你来自哪里?
答︰香港。

问︰你什么时候参加工作假期?
答︰2014年。大学毕业之后,我take咗年gap year(空档年),净系返吓part-time(兼职)同埋去旅行。到第二年慨毕业季(九月),觉得自己仲未想求其搵份工定落嚟,就决定去英国working holiday。

问︰你曾到哪里工作假期?为什么会选择那个地方为目的地?
答︰我本身教英文慨,都钟意英国慨文化,而且揸BNO(英国国民(海外)护照)申请去英国working holiday冇名额限制,几时去都得。咁同年毕业慨同学个个都搵紧工或者返紧工慨时候,我就出发去英国了。

问︰在工作假期期间,你曾经做过什么工作?你又有修读什么短期课程吗?
答︰我第一年喺曼彻斯特(Manchester)慨一间餐饮业公司慨写字楼做文职,之后又喺唐人街慨珍珠奶茶店打工。其实嗰段时间过得唔系咁开心,觉得自己浪费紧时间,生活多数喺唐人街,旅行又去得唔多。于是决定夏天离开曼彻斯特,先返香港探一探屋企人,再谂之后慨打算。九月返到香港,屋企人当然有微言,觉得我大学毕业点解唔乖乖哋喺香港认真工作,反而去外国打散工。当见到身边同学朋友都开始建立事业,都有谂过︰「不如留喺香港算啦!」
但平静落嚟谂返,我去英国唔系要赚大钱,纯粹想试吓去外国生活。如果我咁就完咗个working holiday,咁我喺英国慨回忆就只有唔开心,而冇好好享受过,亦都冇真正认识过英国,所以我决定——再试多次。我这半世未算赶,何妨迷路看风光?
于是2015年10月,我去咗伦敦。
因为之前慨经历,调整咗自己心态同期望。知道喺一个新地方开始唔容易,要比上次付出更大努力。嚟到伦敦我订咗个目标畀自己,要喺一个星期之内搵到屋同埋搵到工。结果我真系做到——第三日就搵到屋,第四日就返工。
住方面,我喺北面一间sharehouse(合租房屋)租咗个套房,为咗平拣咗一个比较杂慨区,仲要行二十分钟先到地铁站。(呢样唔值得学习,大家要安全为先!之后转咗工后,我有搬去好啲环境㗎。)
工方面。虽然生活指数很高,但伦敦对working holiday-er(工作假期参加者)嚟讲绝对系最容易搵到工慨城市。除咗最简单慨餐饮业外,零售业都系大部份人慨选择。呢度好兴walk-in递CV(直接进店内递交履历表)。好多人会去名店街,例如Oxford Street(牛津街)、Regent Street(摄政街)、Bond Street (庞德街)慨铺头,由街头派落街尾。零售业知你懂两文三语,收到你CV好快就会打电话邀请你面试。与此同时我又会上英国慨中/英求职网应征。当时心态系觉得有咩工就做住先,最紧要唔好冇收入,之后可以边做边搵比较理想慨工作。结果我卖咗几日衫,就转到去律师楼做文职。由搵到呢份新工开始,可以话所有嘢都嚟个大逆转,搵返之前喺曼彻斯特打沉咗慨自信。
嚟到伦敦唔够一个月,学到慨已经比曼彻斯特多。好开心,对得住自己,无浪费到第二次机会。
初时喺律师楼都系做reception(接待),后来老板知道我语文水平不错,就畀我负责翻译工作,由普通文件,到法律文件,之后仲有帮中国驻英大使馆做慨英国政策分析报告等等。得到机会同赏识好开心,更重要系搵返对自己慨肯定。

问︰请分享你在工作假期中一个最难忘的经历。
答︰喺律师楼做咗冇几耐,有次大老板搵我倾偈,同我讨论一啲香港慨社会时事。老板系英国华人,佢有批评而家慨香港年青人唔爱国、做嘢好冲动、唔顾后果……我一直觉得海外华人讲爱国系好矛盾慨一件事,口里说不身体却很诚实,但老板讲到海外华人一定爱国嗰阵讲咗句︰「我哋咁多年一直受外国人歧视。中国强大我哋就强大,所以我哋先咁爱国。」我唔系认同佢呢句说话慨逻辑,但呢番说话令我思考咗好耐,好似将心底一个谜底解开咗咁。呢次交谈系个好特别慨体验,竟然有机会同海外华人讨论时政,即使大家睇法未必一样,但都可以理性对话,了解吓大家慨谂法。
另外都留意到海外华人有啲好有趣慨习俗,将本身华人社会慨传统文化糅合咗西方文化。例如佢哋会将圣诞当系农历新年咁过,大老板会派利是呀,我去咗一个BBC(英籍华人)朋友屋企过圣诞,佢地会食完圣诞大餐第二日就去酒楼食团年饭。
旅行方面,我冇好似其他人游遍成个欧洲,而系尽量走遍英国。我好钟意坐火车,每个周末都会坐火车去唔同城市,或者去就近曼彻斯特或者伦敦近郊慨地方。蓝蓝绿绿慨火车景,系其中一样英国最靓慨细节。
英国之中,我最钟意系一个叫康和(Cornwall)嘅County(群),喺英国西南面尽头,由伦敦坐火车去康和要五至六个钟,主要城市包括Penzance、St.Ives。边度都好靓,夏天坐住火车沿海直入英国西南部,你会希望呢程火车永远都唔会到终点站。
大不列颠帝国除咗英格兰同苏格兰,仲有威尔斯同北爱尔兰都好靓,千祈唔好漏咗佢地!

问︰工作假期为你带来最大的收获是什么?
答︰最大慨收获……好老套咁讲系知道自己慨不足。去英国之前我觉得自己英文都几好,但嚟到英国接触地道慨英式英文,觉得自己好似又聋又哑咁,听唔明又讲唔好,觉得自己英文好差,打击好大,发现自己之前慨世界真系好窄。然后又试过搵唔到嘢做,令我不停怀疑自己,失去自信。
去到伦敦之后,因为曼彻斯特慨一年,我已经适应到英式英文,仲搵到方法练习去令自己进步。工作上又做得唔错有成功感,工余时间可以坐火车、行书店、睇舞台剧同芭蕾舞等,真正明白work-life balance(工作与生活平衡)慨意义。
我觉得自己真系透过working holiday感受到外国生活,接触外国文化,而唔系打过吓工煮吓饭洗吓衫独立生活呢啲喺香港都可以做到慨嘢。最重要系我搵到自己钟意慨嘢,喺英国生活对艺术多咗认识,返到香港继续接触,发现原来香港都有好多好好慨艺术作品,又有好多来自世界各地慨表演者嚟香港演出。香港真系好多好有趣慨东西,好多人话香港闷,其实可能系自己个人闷。我发现自己个人唔同咗,返到嚟再见到慨香港亦唔再一样,游子归家后重新爱上香港。

问︰对于那些打算到你目的地工作假期的青年人,你能否给他们三个贴士?
答︰
1) 
要调整心态。有啲人目标订得太高,例如觉得自己英文好,一定要搵到文职,但其实唔系咁易,呢度个个都识英文,点解要请你呢?我觉得既然就走得出嚟,不如试吓唔同慨嘢。我打珍珠奶茶工慨半年练好咗流利国语;我有朋友做零售识到一堆欧洲籍朋友一大班人每日返工折衫都好开心,又有朋友喺苏格兰高地隐世打工,呢啲体验都非常特别喺香港难啲试到。如果净系讲做文职,咁点解唔留喺香港,待遇仲更好啦?
但另一方面,我觉得都唔可以净系做零售业或者饮食业做足两年,新尝试系好,但多尝试更好。都系嗰句,出得嚟,要试更多做更多!
2) 
如果去英国working holiday,个人觉得选择伦敦比较好,除咗工作机会较多,仲会见到更多唔同国籍唔同背景唔同性格慨人。喺啲多华人慨城市例如曼彻斯特、 Leeds、Birmingham,虽然都容易搵到工,但你嚟到英国,都唔会想留返喺华人圈子吧?

3) 
一定要搵机会去睇波!英超联赛慨气氛系咁多个足球联赛之中最热烈慨(票价亦都最贵!)英国本土球迷好热衷足球,你要睇波?做咗会员都要抽签先买到飞,仲要好多人一订系订年票,要佢地放出嚟合法慨二手票网先有散飞,以致英超一票难求!
现场睇波气氛好好,球迷情绪高涨,就算你本身唔钟意足球,入到去都会睇得好兴奋。除咗英超,我有朋友睇过英冠都话好好睇。另外有朋友睇过温布顿网球、桌球大师赛都好正。去到英国一定要体验吓!


问︰还有没有什么是你想补充的?
答︰好多人话去working holiday系浪费时间,返到嚟唔会有雇主肯请……但其实英国working holiday呢两年我得到好多。如果唔系第一年慨失败,唔会有第二年慨开心。而第二年慨工作同文化体验令我返到嚟香港搵工好顺利。而且英国两年磨练令我两文三语更好,语言上学到慨系超越廿年读慨书。我希望你,一旦决定要出去,就要跑得很远!

提提你:以上各个参加者的经验分享乃属个人意见,并不代表劳工处的立场。工作假期参加者在出发前应做好资料搜集,以取得最新和有效的资讯。

(Chinese version only)

  返回