煙火短暫 卻漂亮地綻放過

By

問︰你來自哪裡？
答︰香港。

問︰你什麼時候參加工作假期？
答：2024-2025。

問︰你曾到哪裡工作假期？為什麼會選擇那個地方為目的地？
答︰澳洲。好耐以前已經想去working holiday，澳洲冇名額限制，而且可以用英文溝通，網上資訊都比較多，所以第一站就選擇咗澳洲。

問︰在工作假期期間，你曾經做過什麼工作？你又有修讀什麼短期課程嗎？
答︰我主要係打工換宿。去咗澳洲六個州，試過住喺農場，主要負責除草、摘生果、照顧動物，亦試過住喺城市，職責係打理花園同打掃。

問：請分享你在工作假期中的難忘經歷。
答：自己一個出發去咁遠嘅地方，其實有好多瞬間都好難忘。第一樣就係我喺塔斯曼尼亞打工換宿，住喺一片深山入面，完全冇網絡同訊號，但每日都過得好充實。同當地識到嘅朋友一齊煮飯、生火、劈柴、抬頭睇漫天星星、臨瞓前圍住火爐傾偈、每朝起身去餵袋鼠。雖然嗰陣係塔斯曼尼亞嘅冬天，喺森林入面好凍，但諗返起有過咁特別嘅體驗，係我喺寒冬入邊最溫暖嘅回憶。 而第二樣就係住青年旅舍嘅時候識到好多朋友，我哋仲即興約埋一齊去road trip，嗰日係我離開澳洲嘅前一日，可以一齊去睇多次南太平洋，係最好嘅道別方式。

問：工作假期為你帶來最大的收穫是什麽？
答︰我覺得係有幸以雙眸見證澳洲獨一無二嘅風景，亦發現原來自己可以有勇氣做到咁多嘢。以前喺香港好似有一條既定嘅路線要跟隨，但原來踏出咗comfort zone之後，可以體驗到世界係幾咁大。

問：對於那些打算到你目的地工作假期的青年人，你能否給他們一些貼士？
答：
1）如果有興趣打工換宿嘅話，有好多平台揀，而我係用helpx。出發前最好向host問多啲問題，例如每星期要做幾多個鐘、係咪包一日三餐、住宿安排，因為好多host嘅介紹都唔清晰，如果去到先發現貨不對辦，就盡快搵方法離開。

2）澳洲超市每個星期都有特價嘅貨品，見到鍾意嘅零食可以入手買多啲。

3）雖然我超級超級內向，但我都好推介住青年旅舍，因為好彩嘅話真係會遇到好多有趣嘅人，喺一片陌生嘅土地，同對方傾偈、分享自己嘅故事、搵到同自己有共鳴嘅人（就算識唔到人嘅話，我都好推介住青旅，價錢最平，而且多數喺市中心附近，係認識一個地方嘅好開始）。

問：還有沒有什麼是你想補充的？
答︰喺澳洲每一日都好似新嘅一樣，但原來我同澳洲嘅時光每日都喺度倒數。 即使旅程總有結束嘅一日，但我好慶幸自己有出發去澳洲，有啲事係要趁青春尚在去做。既然每個人都唔同，點解我哋追隨嘅係同一樣嘢？趁著還有夢想，勇敢地出發去看世界吧～！

提提你：以上各個參加者的經驗分享乃屬個人意見，並不代表勞工處的立場。工作假期參加者在出發前應做好資料搜集，以取得最新和有效的資訊。

(Chinese version only)