烟火短暂 却漂亮地绽放过

分享者：

问︰你来自哪里？
答︰香港。

问︰你什麽时候参加工作假期？
答：2024-2025。

问︰你曾到哪里工作假期？为什麽会选择那个地方为目的地？
答︰澳洲。好耐以前已经想去working holiday，澳洲冇名额限制，而且可以用英文沟通，网上资讯都比较多，所以第一站就选择咗澳洲。

问︰在工作假期期间，你曾经做过什麽工作？你又有修读什麽短期课程吗？
答︰我主要係打工换宿。去咗澳洲六个州，试过住喺农场，主要负责除草、摘生果、照顾动物，亦试过住喺城市，职责係打理花园同打扫。

问：请分享你在工作假期中的难忘经历。
答：自己一个出发去咁远嘅地方，其实有好多瞬间都好难忘。第一样就係我喺塔斯曼尼亚打工换宿，住喺一片深山入面，完全冇网络同讯号，但每日都过得好充实。同当地识到嘅朋友一齐煮饭、生火、劈柴、抬头睇漫天星星、临瞓前围住火炉倾偈、每朝起身去餵袋鼠。虽然嗰阵係塔斯曼尼亚嘅冬天，喺森林入面好冻，但谂返起有过咁特别嘅体验，係我喺寒冬入边最温暖嘅回忆。 而第二样就係住青年旅舍嘅时候识到好多朋友，我哋仲即兴约埋一齐去road trip，嗰日係我离开澳洲嘅前一日，可以一齐去睇多次南太平洋，係最好嘅道别方式。

问：工作假期为你带来最大的收穫是什么？
答︰我觉得係有幸以双眸见证澳洲独一无二嘅风景，亦发现原来自己可以有勇气做到咁多嘢。以前喺香港好似有一条既定嘅路线要跟随，但原来踏出咗comfort zone之后，可以体验到世界係几咁大。

问：对于那些打算到你目的地工作假期的青年人，你能否给他们一些贴士？
答：
1）如果有兴趣打工换宿嘅话，有好多平台拣，而我係用helpx。出发前最好向host问多啲问题，例如每星期要做几多个钟、係咪包一日三餐、住宿安排，因为好多host嘅介绍都唔清晰，如果去到先发现货不对办，就尽快搵方法离开。

2）澳洲超市每个星期都有特价嘅货品，见到锺意嘅零食可以入手买多啲。

3）虽然我超级超级内向，但我都好推介住青年旅舍，因为好彩嘅话真係会遇到好多有趣嘅人，喺一片陌生嘅土地，同对方倾偈、分享自己嘅故事、搵到同自己有共鸣嘅人（就算识唔到人嘅话，我都好推介住青旅，价钱最平，而且多数喺市中心附近，係认识一个地方嘅好开始）。

问：还有没有什麽是你想补充的？
答︰喺澳洲每一日都好似新嘅一样，但原来我同澳洲嘅时光每日都喺度倒数。 即使旅程总有结束嘅一日，但我好庆幸自己有出发去澳洲，有啲事係要趁青春尚在去做。既然每个人都唔同，点解我哋追随嘅係同一样嘢？趁着还有梦想，勇敢地出发去看世界吧～！

提提你：以上各个参加者的经验分享乃属个人意见，并不代表劳工处的立场。工作假期参加者在出发前应做好资料搜集，以取得最新和有效的资讯。

(Chinese version only)